अछाम । सुदूरपश्चिम प्रदेश भेटेरीनरी अस्पताल तथा पशु विज्ञ केन्द्र, मंगलसेन अछामको आयोजनामा र ढकारी गाउँपालिका पशु सेवा शाखा, ढकारीको सह–आयोजनामा ढकारी गाउँपालिका भित्र रहेका सबै प्रकारका पशुपन्छीमा विभिन्न महामारीजन्य रोगको नियन्त्रण तथा रोकथामका लागि पूर्ण खोप अभियान सुरु गरिएको छ।

यो अभियान मंसिर ५ गतेदेखि औपचारिक रूपमा प्रारम्भ भएको हो। खोप अभियानअन्तर्गत गाउँपालिकामा रहेका गाई–भैँसी, बाख्रा–खसी, कुखुरा, सुंगुरलगायतका सम्पूर्ण पशुपन्छीलाई लक्षित खोप लगाइनेछ।

पशु स्वास्थ्य विज्ञहरूका अनुसार पछिल्ला वर्षमा देखिएको महामारीजन्य रोगका कारण किसानहरू ठूलो आर्थिक क्षतिमा पर्ने गरेका छन्। त्यसैले आफ्ना पशुहरूलाई अनिवार्य रूपमा खोप लगाउन किसान तथा पशुपालकलाई आग्रह गरिएको छ। खोपले रोगको जोखिम मात्र कम हुँदैन, मानव स्वास्थ्यमा पर्न सक्ने सम्भावित असर र क्षतिबाट पनि सुरक्षा प्रदान गर्छ।

ढकारी गाउँपालिका पशु सेवा शाखाले कुनै पनि किसान खोप सेवाबाट वञ्चित नहोस् भन्ने उद्देश्यले घर–घरमै पुगेर सेवा प्रदान गर्ने तयारी गरेको जनाएको छ।